syriahomenews أخبار سورية الوطن
كمال عبد الكريم
كنا شباب كتير مبسوطين
متل الدهب بالشمس عم نلمع
نركض ورا الحلوين والحلوات
والنار جوا قلوبنا تولع
كنا إمارة حب وسلاطين
نقعد ع عرش الحب نتربع
نسهر لحد الصبح صحيانين
وعند الصبح بالحب نتودع
مرقنا على بوابة تمانين
واللي مضى من العمر مابيرجع
ماعاد نسمع نغمة حساسين
ولا عاد مشيات الدلع نقشع
ماعاد نكتب شعر بدواوين
ولا عين عشق بحبنا تدمع
صرنا منمشي متل سكرانين
من دفشة العصفور رح نوقع
صرنا منحكي متل طرشانين
يادوب نسمع ضربة المدفع
صرنا متل بردات بكوانين
والبرد يلدع قلبنا ويلسع
نقعد بقلب النار بردانين
نبكي على الماضي ونتوجع
صرنا لأمر الرب منتظرين
ما عاد طن من الدوا بينفع
ما بيرجع اللي راح ما بيرجع
نحنا ع بطن الارض رح نرجع
(سيرياهوم نيوز3-صفحة الاستاذ كمال)
